A su Poettu

S’acqua de custu mari è de cristallu

in custu mengianeddu settembrinu,

mi stontonara prus chi a buffai binu,

pariri apparicciara po unu ballu.

Non scis cali sia mari e cali xelu,

chi funti ‘e unu colori tottu uguali

de un’asulu aicci uguali, chi ti pari

chi sezia in barca lompas a su xelu.

Esti un ollu, unu sprigu, esti unu lagu

dogna cosa si spriga peis a susu

de barchittas, de montis ndi bis dusu,

s’immagini è prus clara pagu pagu…,

Cali pinzellu ‘e fata ari spruinau

sa Sella de su Tiaulu a chizzixeddu?

Si bì limpiau dogna cammineddu

e sa Sedda è de zuccuru filau.

Is montis prus asulus de su xelu

si spriganta in su mari ananti ananti,

si ndi funti spollaus de dogna velu

casi po fai presceri a su bagnanti.

Si funti cuncordaus unu cappeddu

de nuis colori ‘e meli e de arrosa,

chi non si movi po nisciuna cosa,

comenti unu bucchettu piticheddu.

S’acqua sa terra arribara a toccai

cun sa bellesa de una marettedda

arrizzara in sa punta a triniscedda,

fatta de fioca, bianca cantu mai.

Teresa Mundula Crespellani